« mOSSkou | Hoofdpagina | Limburg in de steigers »
12 februari 2010
Sjleutel-euverdracht Poart van Limburg
Wethouder Kirkels, angere notabelen, luuj oet het bedriefslaeve, (hoogheid Prins Henk, Vors Jan mit ziene wieze road,) Rogstaekerinnekes, Rogstaekers en anger luuj,
Het is de tied van het joar dae het mich meugelik maak, maar angere zeker neet verplich
Om het woord tot uch te richte in het plat en auch nog in de vorm van ein gedich
Fein dèt ich vemörrege hie moog sjpreake
Bèn gerös ich hauwt het kort en zal zeker neet lang praeke
Ich maakde in miene agenda gaer get tied
Want vandaag is het eindelik dan ech zo wiet
Mit “Vandaag” haet Venlo Weert veurige waek vriedig versjlaage
Ich zèk uch eerlik: Limburg laeftj met de Vasteloavendj kèn ich vööl baeter verdraage
Mit subsidie oet de Provinsjale crisispot sjtreefde geer Venlo wiet veurbie
Doa zeen die stök of twintjig punte meer bie het LVK gaar oet niks bie
Loat ich uch in het kort vertèlle woarom ich hiej sjtoan
Want doa is natuurlik gèt aan veuraaf gegoan
Os landj en dus auch Weert krig beheurlik gèt van de crisis mit
Dèr wurd vööl euver gesjproake mèr neemes wèt wie het presies zit
Daorom höbbe wethouder Kirkels en ich saame oetgezoch
Wie weer de Poart van Limburg kreege vlotgetroch
Hae bie de gemeinteroad en ich bie Provinsjale sjtoate
Höbbe dit sjitterende projek verdedigd mit meer dan allein maar proate
Veer höbbe de wèt van 3W in sjtèlling gebrach
Werk, woone en welzijn zeen op de Poart van Limburg van krach
Het boewe aan dit projek wurd neet allein door ervaare luuj gedoan
Door het toepasse van leerlingboewplaatsje kènt auch de nuuj generaasie sjtraks hun mènneke sjtoan
Oet de crisispot van de Provinsie krig Weert het groatste bedraag
2,7 miljoen Euro dèt kriste toch ech neet jeederen daag
Mit dees biedrage kènt de Poart van Limburg eindelik van sjtart goan
Dan hoove de luuj van Weert neet langer in de kauw te sjtoan
Exploitant Bart Nelisse haet mit het zaalecentrum heel gooj intensies
Hèt is gesjik veur Vastloavend, bloelofte, vereiniginge én conferensies
Aan dees kategorie projekte wirk de Provinsie heel gaer mit
En waal omdèt auch in de Poart van Limburg òs doelsjtelling zit
Hawt de sjtad, hèt dörp de buurt en auch de wiek
Laefbaar veur awt en versjlete, middelbaar, jònk en kwiek
Noe Zunjig mot wethouder Kirkels zelluf aan de bak
Dan sjteit hie of op ein anger plaatsj de Raod van Elluf stief in ut pak
Auch Prins Henk zèt dan zien bèste sjteekske veur
Dan is de wereldlikke mach drie daag aaf van alle gezeur
De sjleutel van de sjtadt mòt hae dan waal euverdrage
Ich betwiefel het of de wethouder dèt waal zal waage
Maar veur ut geval dat dèt neet goot dreig te gaon
Wil ich naames de Provinsie auch hie mien mènneke veur sjtaon
Daorom vroag ich noe gaer nao veure mit vööl geraas
Wethouder Kirkels tot zunjigmörrege nog effekes de baas
Wethouder ich reik uch noe eine sjleutel aan
Geine gootkaupe en auch veurzeen van ein root-gael-greune vaan
Hèt is de sjleutel van de Poart van Limburg hiej
Woaveur de gemeinte en Provinsie wirke zie aan zie
Ich wunsj uch, de ontwikkelaer en de boewers alle goots mit dit projek
Hèt wurt fantasties, maar maak de luuj hael eave de kop neet gek
De kommende daag wurt neet gewirk aan de Poart, mèr klink euveral meziek
Dan trèk Vors Jan en de wieze Road mit Prins Henk veurop door hèt Rogsteakersriek
Vors Jan mòt der saame mit ziene Road noa de Vasteloavend dan sjnel ein ènj aan breije
Want mit vors in de buurt, kènne de betonmeules hiej ech neet dreije
Ich hauwt noe miene mondj; ich höb genog gezag
Vööl sukses; ich dank uch veur uch aandach!
Gepubliceerd door Noël Lebens om 12 februari 2010 12:05